नगर – महाराष्ट्र आरोग्य विज्ञान विद्यापीठ, नाशिक यांच्यातर्फे घेण्यात आलेल्या बीडीएस चतुर्थ वर्ष २०२३ – २०२४ पदवी परीक्षेसाठी घेण्यात आल्या होत्या. त्यामध्ये महाराष्ट्र राज्यातील सर्व विद्यार्थ्यांमध्ये यशवंतराव चव्हाण दंत महाविद्यालय, अहिल्यानगर या महाविद्यालयातील कु. पाचांळ ध्रुवी हिने दुसरा क्रमांक आणि कु.

गुंड वैष्णवी यांनी पाचवा क्रमांक प्राप्त केला.

या गुणवंत विद्यार्थीनींच्या यशाबद्दल महाविद्यालयाच्या .

उपाध्यक्षा कु. नेहल प्रशांत गडाख पाटील, मुळा एज्युकेशनचे उपाध्यक्ष उदयन शंकारराव गडाख पाटील, कार्यकारी विश्वस्त डॉ. सुभाष देवढे पाटील, तसेच अधिष्ठाता डॉ. राजहंस निलिमा श्रीपाद यांनी त्यांचे अभिनंदन केले आहे.

पद्मश्री पोपटराव पवार यांचे प्रतिपादन नगर – शिर्डी रोडवरील विळद येथे काळेज् ऑर्किड रिसॉर्ट हे नगरच्या जिरायत भागात पर्यटन म्हणून पाहिले जाईल, असे प्रतिपादन पद्मश्री पोपटराव पवार यांनी केले.

ते नुकत्याच रिसॉर्टच्या उद्घाटनप्रसंगी बोलत होते. सीए ज्ञानेश्वर उर्फ राजेंद्र काळे यांच्या मातोश्री श्रीमती शांताबाई काळे व त्यांच्या कन्या कु. सई व कु. राजनंदिनी यांच्या हस्ते फीत कापून उद्घाटन झाले. यावेळी सुजय विखे पाटील, भाजपचे शहर जिल्हाध्यक्ष अॅड. अभय आगरकर, शाहीर विजय तनपुरे, जि. प. सदस्य संदेश कार्ले, शिक्षक आप्पा शिंदे यांच्या प्रमुख उपस्थितीत उद्घाटन सोहळा पार पडला.

यावेळी पुढे बोलतांना पवार म्हणाले की, नगरकरांना आता महाबळेश्वर, लोणावळाखंडाळा येथे जाण्याची गरज राहणार नाही.

येथे त्या हिलस्टेशन सारखाच थंडगार फील येत आहे.

सुजय विखे पाटील म्हणाले की, नाशिकच्या धर्तीवर बॅकवॉटरला जसे टुरिझम झाले आहे तसे विळदलाही पर्यटन वाढेल व त्यामुळे नगर शहरात पर्यटन वाढण्यास नक्की हातभार लागेल. काळे कुटुंबांनी केलेला पर्यटनवाढीसाठी केलेला हा प्रयत्न नक्कीच कौतुकास्पद आहे. या नाविन्यपूर्ण उपक्रमास अभय आगरकर यांनी शुभेच्छा दिल्या. प्रांताधिकारी सुधीर पाटील यांच्या हस्ते रिसॉर्टच्या वेबसाइटचे उद्घाटन करण्यात आले. सौ. मनिषा बारस्कर-काळे यांनी आभार मानले

भिंगार – सालाबादप्रमाणे भिंगार पंचक्रोशीतील राधानगरी नागरदेवळे येथील श्रद्धास्थान ‘श्री साईबाबा मंदीरचा नववा वर्धापन दिन सोहळा’ निमित्त विविध धार्मिक कार्यक्रमांचे आयोजन करण्यात आले आहे.

श्री साई चरित्र पारायण, सौ. धनश्री शिंदे (सनातन संस्था) यांचे साधना विषयक प्रवचन, हरिपाठ तसेच शुक्रवारी सायंकाळी ७वाजता रामायणाचार्य हभप गोरक्षनाथ दुतारे महाराज यांच्या वाणीतून भजन संध्या कार्यक्रम झाला. साई मंदिराचे संस्थापक, अध्यक्ष महेश राजेंद्र झोडगे, उपाध्यक्ष दिलीप गुगळे, शास्त्रीय संगीत विशारद ओंकार देऊळगावकर, मंदिराचे पुजारी देशपांडे गुरुजी, आशुतोष गलांडे, ओंकार आव्हाड, गौरव त्रिमुखे, आदित्य कापरे आदींसह मंडळाचे कार्यकर्ते, सर्व भजनी मंडळ नागरदेवळे व भिंगार तसेच साई भक्तगण उपस्थित होते. भजन संध्येत साई तुझ्या दर्शनाची ओढ लागली, तुझे गीत गाण्यासाठी सूर लागू दे रे…, साई तुझे नाव गोड आदी साईंच्या भजनांनी राधानगरी दुमदुमली. शनिवारी संध्याकाळी ५ वाजता श्री साईंची पालखी मिरवणूक व ग्रामप्रदक्षिणा होणार आहे. तसेच रविवारी सायंकाळी ७ वाजता महाप्रसादाचे वाटप केले जाणार आहे. या कार्यक्रमासाठी साई भक्तांनी उपस्थित राहावे, असे आवाहन साई मंदिराचे संस्थापक अध्यक्ष महेश झोडगे यांनी केले आहे

नगर – एमआयडीसी मधील उद्योजकाला दोघांनी भरदिवसा आणि मोठी वर्दळ असलेल्या आनंदधाम रस्त्यावर लुटल्याची घटना शुक्रवारी (७ फेब्रुवारी) दुपारी १२ वाजण्याच्या सुमारास घडली. राजाराम राय (वय ६२, रा.एमआयडीसी, नगर) असे या उद्योजकाचे नाव आहे. त्यांच्या गळ्यातील २ तोळ्याची सोन्याची चेन आणि प्रत्येकी १ तोळ्याच्या सोन्याच्या २ अंगठ्या या चोरट्यांनी लंपास केल्या आहेत.

याबाबत मिळालेली माहिती अशी की उद्योजक राजाराम राय यांचा एमआयडीसी परिसरात राजलक्ष्मी इंडस्ट्रीज नावाची कंपनी आहे. त्यांच्या कंपनीचे अनेक ग्राहक शहर परिसरात आहेत. राय हे शुक्रवारी कामानिमित्ताने नगर शहरात आले होते व चाणक्य चौक मार्गे आनंदधाम रस्त्याने भवानीनगर येथे त्यांच्या ओळखीचे अजित कर्नावट यांच्या कडे आपल्या मोपेडवर जात होते. दुपारी १२ च्या सुमारास माजी खा. स्व. दिलीप गांधी यांच्या घराच्या समोरील बाजूस त्यांच्या पाठीमागून पल्सर मोटारसायकल वर दोघेजण आले. त्यातील एकाने डोक्यात हेल्मेट घातलेले होते.

त्यांनी मोटारसायकल राय यांच्या मोपेडला आडवी लावून त्यांना थांबविले व पोलिस असल्याच्या थाटात त्यांना तुम्ही हेल्मेट का नाही घातले? तुमचा वाहन चालविण्याचा परवाना दाखवा असे दटावले. त्यानंतर तुम्हाला कळत नाही का, या भागात किती चेन स्नॅचिंग च्या घटना घडत आहेत. तरीही तुम्ही गळ्यात सोन्याची चेन, हातात अंगठ्या घालून फिरता. कालच या परिसरात चेन स्नॅचिंग झाली आहे. त्यामुळे तुम्ही गळ्यातील चेन आणि अंगठ्या काढून ठेवा असे म्हणत त्यांना त्या काढायला लावल्या. त्यानंतर खिशातून एक कागद काढला व यात ठेवा त्या वस्तू असे म्हणत त्यांना वस्तू कागदात ठेवायला लावल्या.

त्यानंतर तुमच्या गाडीची डिक्की उघडा असे म्हणाले. त्यामुळे राय यांनी डिक्की उघडली. त्यावेळी त्यांनी कागदाची पुडी त्यांच्या हातात देत हे दागिने डिक्कीत ठेवा आणि या परिसरातून पुढे घेल्यावर ते गळ्यात आणि हातात घाला. असे म्हणून तेथून मोटारसायकलवर निघून गेले. काही वेळाने राय यांना शंका आल्याने त्यांनी डिक्कीतील कागदाची पुडी उघडून पाहिली असता त्यात दागिन्यांच्या ऐवजी दगड होते.

त्या दोघा भामट्यांनी आपली नजर चुकवून हातचलाखी करत दुसरीच पुडी आपल्या हातात देवून आपली फसवणूक केल्याचे राय यांच्या निदर्शनास आले. त्यानंतर त्यांनी घडलेला प्रकार त्यांच्या ओळखीचे अजित कर्नावट यांना सांगून त्यांच्या सोबत कोतवाली पोलिस ठाण्यात जावून फिर्याद दिली. या फिर्यादी वरून पोलिसांनी अज्ञात दोघा भामट्यांच्या विरुद्ध गुन्हा दाखल केला आहे.

पालकमंत्री साहेब, वनविभाग काय केडगावची पुनरावृत्ती व्हायची वाट बघतोय का ?

नगर – नगर शहर परीसरासह नगर तालुक्याच्या गावागावात बिबट्यांचा वावर मोठ्या प्रमाणात वाढला असताना वन विभागाकडून फक्त पाहणी करून बिबट्यांच्या ठशांचे फोटो काढणे, काही ठिकाणी पिंजरा लावला तर लावणे अशी थातूरमातुर कामे केली जात आहेत. मात्र दररोज बिबट्याच्या भीती खाली वावरणाऱ्या नागरिकांना दिलासा काही मिळत नाही. मागील वर्षी प्रमाणे जर केडगाव सारखी आपत्कालीन परिस्थिती उद्भवली तर नगरच्या वन विभागाकडे पीआरटी (प्रायमरी रिसपॉन्स टिम) आणि रेस्क्यू टीम आहे का? जर नसेल तर पालकमंत्री साहेब यात लक्ष घालणार का? की केडगावच्या घटनेची  पुनरावृत्ती व्हायची वाट पाहताय? असा सवाल उपस्थित होत आहे.

मागील वर्षाच्या फेब्रुवारी महिन्यातच केडगावच्या नागरी वसाहतीमध्ये बिबट्याची मध्यरात्री झालेली एन्ट्री  त्यानंतर परिसरातील नागरिक मध्ये पसरलेली दहशत आपण पाहिलीच असेल .पहिल्यांदाच नगरच्या उपनगरात नागरी वसाहतीमध्ये बिबट्याची झालेली इंट्री केडगाव मधील अनेक नागरिकांना याची कल्पना देखील नव्हती. त्यामुळे सकाळी सकाळी कामासाठी घराबाहेर ज्यावेळेस आपण पडू त्यावेळेस आपण बिबट्यासाठी एक सावज बनू ही त्यांच्या ध्यानीमनी देखील आले नसेल ज्या घराच्या आडोशाला दब धरून बिबट्या बसला होता त्यातील अनेक घरांनी व शेजारीपाजाऱ्यांनी पाहिल्यामुळे याची माहिती परिसरातील नागरिकांना फोन द्वारे कळवल्यामुळे अनेकजण सावध झाले खरे पण ज्यांना याची कल्पना नव्हती ते मात्र बिबट्याच्या हल्ल्यामध्ये गंभीर जखमी झाले.

अनेक नागरिक झाले होते बिबट्याच्या हल्ल्यात जखमी

अनेक नागरिकांवर  या बिबट्याने हल्ला चढवत घायाळ करून सोडले. त्यावेळेस देखील बैल गेला आणि झोपा केला याची प्रचिती केडगावकरांना वनविभाग एक तास उशिरा आल्यानंतर आली. वनविभाग, नागरिक तसेच पोलीस प्रशासनामध्ये थोडी बाचाबाची देखील झाली. प्रशासनाला यावेळी नागरी रोषाला सामोरे जावे लागले होते. त्यानंतर सकाळी ९ वाजल्यापासून बिबट्याने दहशत माजवत संध्याकाळी पाच वाजेपर्यंत अनेक नागरिकांना घायाळ केले होते. वन विभागाकडे पिंजरा व बिबट्याला पकडण्यासाठी जाळ्या शिवाय काहीही नव्हतं. त्यानंतर बिबट्याची दहशत पाहता व नागरिकांचा वाढत चालेला रोष यांची दखल घेत नगरच्या वन विभागाने तात्काळ संगमनेरच्या रेस्क्यू टीमला पाचारण केले.

नगर – एमआयडीसी मधील उद्योजकाला दोघांनी भरदिवसा आणि मोठी वर्दळ असलेल्या आनंदधाम रस्त्यावर लुटल्याची घटना शुक्रवारी (७ फेब्रुवारी) दुपारी १२ वाजण्याच्या सुमारास घडली. राजाराम राय (वय ६२, रा.एमआयडीसी, नगर) असे या उद्योजकाचे नाव आहे. त्यांच्या गळ्यातील २ तोळ्याची सोन्याची चेन आणि प्रत्येकी १ तोळ्याच्या सोन्याच्या २ अंगठ्या या चोरट्यांनी लंपास केल्या आहेत.

याबाबत मिळालेली माहिती अशी की उद्योजक राजाराम राय यांचा एमआयडीसी परिसरात राजलक्ष्मी इंडस्ट्रीज नावाची कंपनी आहे. त्यांच्या कंपनीचे अनेक ग्राहक शहर परिसरात आहेत. राय हे शुक्रवारी कामानिमित्ताने नगर शहरात आले होते व चाणक्य चौक मार्गे आनंदधाम रस्त्याने भवानीनगर येथे त्यांच्या ओळखीचे अजित कर्नावट यांच्या कडे आपल्या मोपेडवर जात होते. दुपारी १२ च्या सुमारास माजी खा. स्व. दिलीप गांधी यांच्या घराच्या समोरील बाजूस त्यांच्या पाठीमागून पल्सर मोटारसायकल वर दोघेजण आले. त्यातील एकाने डोक्यात हेल्मेट घातलेले होते.

त्यांनी मोटारसायकल राय यांच्या मोपेडला आडवी लावून त्यांना थांबविले व पोलिस असल्याच्या थाटात त्यांना तुम्ही हेल्मेट का नाही घातले? तुमचा वाहन चालविण्याचा परवाना दाखवा असे दटावले. त्यानंतर तुम्हाला कळत नाही का, या भागात किती चेन स्नॅचिंग च्या घटना घडत आहेत. तरीही तुम्ही गळ्यात सोन्याची चेन, हातात अंगठ्या घालून फिरता. कालच या परिसरात चेन स्नॅचिंग झाली आहे. त्यामुळे तुम्ही गळ्यातील चेन आणि अंगठ्या काढून ठेवा असे म्हणत त्यांना त्या काढायला लावल्या. त्यानंतर खिशातून एक कागद काढला व यात ठेवा त्या वस्तू असे म्हणत त्यांना वस्तू कागदात ठेवायला लावल्या.

त्यानंतर तुमच्या गाडीची डिक्की उघडा असे म्हणाले. त्यामुळे राय यांनी डिक्की उघडली. त्यावेळी त्यांनी कागदाची पुडी त्यांच्या हातात देत हे दागिने डिक्कीत ठेवा आणि या परिसरातून पुढे घेल्यावर ते गळ्यात आणि हातात घाला. असे म्हणून तेथून मोटारसायकलवर निघून गेले. काही वेळाने राय यांना शंका आल्याने त्यांनी डिक्कीतील कागदाची पुडी उघडून पाहिली असता त्यात दागिन्यांच्या ऐवजी दगड होते.

नगर – इसळक (ता. नगर) शिवारातील खारेकर्जुने रस्त्यावरील खपके वस्तीवर सात जणांच्या टोळयाने शनिवारी (दि.४) पहाटे चांगलाच धुमाकूळ घातला. शस्त्राचा धाक दाखवून दोन घरावर दरोडा टाकून सोन्याचे दागिने, रोकड असा ९१ हजाराचा ऐवज लांबविला. चोरट्यांच्या दहशतीमुळे इसळक शिवारात भितीचे वातावरण निर्माण झाले आहे. या प्रकरणी अनिल सुधाकर खपके (वय ४५, रा. खपके वस्ती, खारेकर्जुने रस्ता, इसळक) यांनी दिलेल्या फिर्यादीवरून सात अनोळखी दरोडेखोरांच्या विरोधात एमआयडीसी पोलीस ठाण्यात दरोड्याचा गुन्हा दाखल करण्यात आला आहे. दरम्यान, दरोडेखोरांची ओळख पटलेली नसून त्यांचा शोध एमआयडीसी पोलिसांसह स्थानिक गुन्हे शाखेच्या पोलिसांकडून घेतला जात आहे. शुक्रवारी रात्री अनिल खपके हे कुटुंबासह घरात झोपी गेले होते. शनिवारी पहाटे सव्वा एक ते सव्वा दोनच्या सुमारास सहा ते सात चोरट्यांनी अनिल यांच्या घरात प्रवेश केला. चोरट्यांच्या हातात कुर्हाड, लाकडी दांडके, कटर होते. त्यांनी शस्त्राचा धाक दाखवून घरातील १८ हजार ५०० रूपयांची रोकड, १.५ ग्रॅमचे सोन्याचे जोडवे, चार ग्रॅमचे सोन्याचे मिनी गंठण, १५ ग्रॅमचे सोन्याचे गंठण, तीन ग्रॅमची सोन्याची अंगठी व एक जाकिट असा ८९ हजाराचा ऐवज चोरला. त्यानंतर त्यांनी आपला मोर्चा शेजारी असलेल्या रामकिसन वसंत खपके यांच्या घराकडे वळविला. त्यांच्या घराच्या कंपाऊंडची तार तोडून व घराची कडी तोडून आत प्रवेश केला. त्यांना शस्त्राचा धाक दाखवून घरातील सामानाची उचकापाचक केली. रामकिसन यांच्या घरात चोरट्यांना दोन हजाराची रोकड मिळून आली. दोन्ही घरातून चोरट्यांनी ९१ हजाराचा ऐवज चोरल्यानंतर ते पसार झाले. सदर घटनेची माहिती एमआयडीसी पोलिसांना देण्यात आली. माहिती मिळल्यानंतर पोलीस अधीक्षक राकेश ओला, अप्पर पोलीस अधीक्षक प्रशांत खैरे, पोलीस उपअधीक्षक (नगर ग्रामीण) संपत भोसले, एमआयडीसी पोलीस ठाण्याचे प्रभारी सहायक पोलीस निरीक्षक जगदीश मुलगीर, उपनिरीक्षक मोंढे, उपनिरीक्षक विनोद परदेशी, जाधव यांनी पोलीस अंमलदारांसह घटनास्थळी भेट दिली. पोलिसांनी दरोड्याचा गुन्हा दाखल केला असून अधिक तपास पोलीस उपनिरीक्षक परदेशी करत आहेत.

श्वसनाच्या संसर्गापासून बचाव करण्यासाठी महानगरपालिकेच्या सूचनांची अंमलबजावणी करावी : आयुक्त तथा प्रशासक यशवंत डांगे यांचे आवाहन

नगर – चीनमध्ये मानवी मेटान्यूमो व्हायरसचा (एचएम पीव्ही) उद्रेक झाल्याच्या वृत्ताच्या पार्श्वभूमीवर राज्याच्या आरोग्य विभागाने मार्गदर्शक सूचना जारी केल्या आहेत. महाराष्ट्रात आतापर्यंत एचएमपीव्हीचा एकही रुग्ण आढळलेला नाही. चीनमधून आलेल्या या नवीन विषाणुमुळे चिंतेचे कारण नसले तरी, नागरिकांनी आवश्यक दक्षता घ्यावी. या प्रकरणी भितीचे वातावरण निर्माण करू नये, महानगरपालिकेने दिलेल्या सूचनांची अंमलबजावणी करावी, असे आवाहन आयुक्त तथा प्रशासक यशवंत डांगे यांनी केले आहे. एचएमपीव्ही हा एक हंगामी रोग आहे. जो सामान्यतः आरएसव्ही आणि फ्लूप्रमाणेच हिवाळा आणि उन्हाळयाच्या सुरुवातीला उद्भवतो. या अनुषंगाने केंद्राच्या आरोग्य विभागाने ३ जानेवारी रोजी निवेदन प्रसिध्द केले आहे. त्यानुसार सार्वजनिक आरोग्य विभागाने राज्यातील श्वसनाच्या संसर्गाच्या आकडेवारीचे विश्लेषण केले आहे. वर्ष २०२३ च्या तुलनेत डिसेंबर २०२४ मध्ये कोणतीही वाढ झालेली नाही. मात्र, खबरदारीचा भाग म्हणून नागरिकांनी श्वसनाच्या संसर्गापासून बचाव करण्यासाठी काय करावे आणि काय करू नये या संदर्भातील सूचनांचे पालन करावे, असे आवाहन आयुक्त यशवंत डांगे यांनी केले आहे. नागरिकांनी हे करावे : १) जेव्हा आपल्याला खोकला किंवा शिंका येत असेल तेव्हा आपले तोंड आणि नाक रुमाल किंवा टिश्यू पेपरने झाका. २) साबण आणि पाणी किंवा अल्कोहोल आधारित सॅनिटायझरने आपले हात वारंवार धुवावेत. ३) ताप, खोकला आणि शिंका येत असल्यास सार्वजनिक ठिकाणांपासून दूर रहावे. ४) भरपूर पाणी प्यावे आणि पौष्टिक अन्न खावे. ५) संक्रमण कमी करण्यासाठी सर्व ठिकाणी पुरेसे वायुविजन (व्हेंटीलेशन) होईल, याची दक्षता घ्यावी. नागरिकांनी हे करू नये : १) हस्तांदोलन करू नये. २) टिश्यू पेपर आणि रुमालाचा पुनर्वापर करू नये. ३) आजारी लोकांशी जवळचा संपर्क टाळावा. ४) डोळे, नाक आणि तोंडाला वारंवार स्पर्श करणे टाळावे. ५) सार्वजनिक ठिकाणी थुंकू नये. ६) डॉटरांच्या सल्ल्याशिवाय औषध (सेल्फ मेडिकेशन) घेऊ नये

नगर – शेवगाव पोलिस ठाण्याच्या हद्दीत सुरु असलेल्या दोन कत्तलखान्यावर स्थानिक गुन्हे अन्वेषण शाखेच्या पोलिसांनी कारवाई करून ५ जणांना ताब्यात घेऊन त्याच्याकडील २ लाख ८ हजाराचा मुद्देमाल जप्त केला. ही कारवाई रविवारी (दि.५) करण्यात आली. पोलीस अधिक्षक राकेश ओला यांनी जिल्हयातील अवैध व्यावसायिकांवर कारवाई करण्याचे आदेश दिले. त्या आदेशान्वये स्थानिक गुन्हे शाखेच्या पोलीस अंमलदारांनी शेवगाव पोलीस ठाण्याच्या हद्दीत सुरु असलेल्या गोवंश जनावरांची कत्तल करुन गोमांस विक्री करणार्‍या दोन कत्तलखान्यांवर कारवाई केली. या कारवाईत अफवान इस्माईल कुरेशी (वय २७), मुज्जाहिद नुरमोहमंद कुरेशी (वय ३०), आरफाद अश्पाक कुरेशी (सर्व रा. रा.खाटीक गल्ली, शेवगाव), एक विधी संघर्षित बालक, बब्बु अजीज शेख, (वय ५५, रा.दादेगाव रोड, शेवगाव) यांना ताब्यात घेऊन त्यांच्याकडून ३१० किलो गोमांस, २ गायी, १ कालवड, १ वासरू व ४ सुरे असा २ लाख ८ हजार रुपये किंमतीचा मुद्देमाल जप्त केला. या प्रकरणी शेवगाव पोलीस ठाण्यात २ वेगवेगळ्या गुन्ह्याची नोंद केली.

नगर – बँकेत गहाण ठेवलेले सोने सोडविण्यासाठी पैसे घेऊन रिक्षातून निघालेल्या दांपत्याकडील ८५ हजाराची रोकड अज्ञात चोरट्यांनी चोरून नेली. सावेडी उपनगरातील स्टेट बँकच्या शाखेपासून ते दिल्लीगेट दरम्यान ही घटना घडली. या प्रकरणी शनिवारी तोफखाना पोलीस ठाण्यात चोरीचा गुन्हा दाखल झाला आहे. शाम दत्तात्रय कुलकर्णी (वय ६३, रा. निर्मलनगर, भगवान बाबा चौक, अहिल्यानगर) यांनी फिर्याद दिली आहे. गुरूवारी दुपारी सव्वा वाजता शाम व त्यांच्या पत्नी कल्पना सावेडी उपनगरातील स्टेट बँक ऑफ इंडियाच्या शाखेत पैसे काढण्यासाठी गेले होते. त्यांनी शाखेतून १ लाख १० हजार रूपये काढले व ते पैसे कापडी पिशवीमध्ये ठेवले. दरम्यान, त्यांना नवी पेठ येथील शहर सहकारी बँकेत गहाण ठेवलेले सोने सोडविण्यासाठी जायचे असल्याने ते एका रिक्षामध्ये बसून नवी पेठे येथे जाण्यासाठी निघाले. पत्रकार चौकात रिक्षा आली असता तेथे दोन अनोळखी महिला व एक मुलगी रिक्षात बसली. शाम व त्यांची पत्नी दिल्लीगेट येथे उतरून पायी शहर सहकारी बँकेत गेले. तेथे गेल्यानंतर पिशवीतील पैसे पाहिले असता त्यातील थोड्याच नोटा शिल्लक असल्याच्या दिसून आल्या. त्यांनी त्या मोजल्या असता २५ हजार रूपये भरले. रिक्षा प्रवासात ८५ हजार रूपये चोरीला गेल्याचे त्यांच्या लक्षात आले. त्यांनी तोफखाना पोलिस ठाण्यात दिलेल्या फिर्यादीवरून पोलिसांनी गुन्हा दाखल केला आहे.

नगर – उपनिबंधक सहकारी संस्था नगर तालुका यांनी रद्द केलेल्या सावकारी परवाना वरील व्यवहाराचे संपुर्ण दप्तर जमा करण्यासाठी वेळोवेळी पत्रव्यवहार करुन ही सहाय्यक निबंधक कार्यालयात दप्तर जमा न केल्याप्रकरणी एका जणा विरोधात कोतवाली पोलीस ठाण्यात गुन्हा दाखल करण्यात आला आहे. जिल्हा उपनिबंधक सहकारी सचिन अदिनाथ ताठे (रा. सावेडी) यांचे सावकारी परवाना रद्द केलेला होता. त्यानंतर त्यांना दि. २३ सप्टेंबर २०२४ पासुन ते १ जानेवारी २०२५ रोजी पर्यंत या परवाना वरील व्यवहाराचे संपुर्ण दप्तर जमा करण्यासाठी वेळोवेळी पत्रव्यवहार करुन तसेच १६ डिसेंबर २०२४ व १ जानेवारी रोजीच्या सुनावणी वेळी संधी देऊन ही त्यांनी दप्तर जमा केलेले नाही. त्यामुळे या प्रकरणी कोतवाली पोलिसांनी अल्ताफ शेख यांनी दिलेल्या फिर्यादीवरुन सचिन ताठे यांचे विरुध्द महाराष्ट्र सावकारी अधिनियम २०१४ मधील नियम ४६ प्रमाणे गुन्हा दाखल केला आहे.

अहिल्यानगर हॉकर्स असोसिएशनचे अध्यक्ष संजय झिंजे यांची मनपा आयुक्तांकडे मागणी

नगर – चितळे रोडवरील नेहरू मार्केटची प्रत्यक्ष पाहणी करून ती जागा अतिक्रमणमुक्त करून भाजीविक्रेत्यांना उपलब्ध करून देण्याची मागणी अहिल्यानगर हॉकर्स युनियनचे अध्यक्ष, माजी नगरसेवक संजय झिंजे यांनी केली आहे. याबाबत त्यांनी मनपा आयुक्त यशवंत डांगे यांची भेट घेवून निवेदन दिले. त्यांच्यासमवेत चंद्रकांत उजागरे उपस्थित होते. आयुक्तांनी निवेदनाची दखल घेत प्रत्यक्ष पाहणीसाठी ७ जानेवारी रोजी येण्याचे आवश्वासन दिले आहे. निवेदनात म्हटले आहे की, नवीन वर्षांत आपल्या आदेशाने शहरात अतिक्रमण हटाव मोहिम राबविण्यात येत आहे. शहराचा एक जबाबदार नागरिक म्हणून या मोहिमेचे स्वागतच आहे. त्याचवेळी शहरातील हॉकर्स युनियनचा अध्यक्ष म्हणून आपणासमोर काही वस्तुस्थिती मांडणे आवश्यक आहे. शहरातील चितळे रोडवरील ऐतिहासिक नेहरू मार्केटची इमारत १३ वर्षांपूर्वी नवीन मोठे संकुल बांधण्यासाठी भुईसपाट करण्यात आली. आज तेरा वर्षानंतर येथे काहीच झाले नाही. उलट ही जागा महापालिकेच्या धोरणात्मक निर्णयाच्या चुकीचे स्मारक बनली आहे. मनपाच्या मालकीची ही मोकळी जागा ना गाळेधारक भाजीविक्रेत्यांच्या उपयोगाची राहिली ना महापालिकेच्या कामाची राहिली. याठिकाणी सध्या अनेक अतिक्रमणे झाली आहेत. टपर्‍या टाकण्यात आल्यात. अनेक जण येथे कचरा आणून टाकतात. लघुशंका करण्यासाठी याच जागेचा उपयोग केला जातो. तसेच अनेकांच्या खाजगी चारचाकी, दुचाकी येथे पार्क केलेल्या असतात. संपूर्ण जागाच अतिक्रमणांनी गिळंकृत केली आहे. हे सर्व आपण प्रत्यक्ष पाहणी केल्यास लगेचच लक्षात येईल. मनपाचे अतिक्रमण विरोधी पथक चितळे रोडवरील भाजी विक्रेत्यांवर कारवाई करीत आहे. वास्तविक एवढी मोठी मोकळी जागा असताना त्यांना नाईलाजाने रस्त्यावर बसावे लागत आहे. मनपाने या जागेवर पे अ‍ॅण्ड पार्क न करता ती जागा अतिक्रमण मुक्त करून दिल्यास भाजी विक्रेते तिथे बसण्यास तयार आहेत. त्यामुळे रस्ताही मोकळा होईल व वाहतुकीला अडथळाही होणार नाही. या जागेची व्यवस्थित साफसफाई करून सार्वजनिक स्वच्छतागृह बांधून द्यावे तसेच चारही बाजूंनी संरक्षक भिंत बांधून दिल्यास भाजी, फळ विक्रेत्यांचा मालही सुरक्षित राहिल. तसेच याठिकाणी लाईटचीही व्यवस्था करावी. त्यामुळे या जागेचा अनधिकृतपणे सुरु असलेला गैरवापरही थांबेल आणि भाजी विक्रेत्यांनाही हक्काची जागा मिळेल. पे अ‍ॅण्ड पार्क सारखे धोरण राबवून या परिसरातील वाहतुक कोंडीची समस्या सुटणार नाही हे वास्तव आहे. गोरगरीब भाजी, फळ विक्रेत्यांना न्याय मिळावा असे झिंजे यांनी म्हटले आहे

कर्ज रक्कम व दंडापोटी ५ लाख २० हजार एका महिन्यात भरण्याचे आदेश

नगर – व्यवसाय वाढीसाठी घेतलेल्या कर्जाची रक्कम विहित मुदतीत परतफेड न करणार्‍या कर्जदाराला नगरच्या अतिरिक्त जिल्हा व सत्र न्यायधीश तेजस्विनी निराळे यांनी ४ महिने सश्रम कारावासाची तसेच कर्ज रक्कम व दंडापोटी ५ लाख २० हजार एका महिन्यात संस्थेकडे भरण्याचे आदेश दिले आहेत. पोपट बाळासाहेब शेवाळे (रा. वडगाव गुप्ता, ता.नगर) असे या कर्जदाराचे नाव आहे. कर्जदार शेवाळे यांनी लक्षवेध मल्टीस्टेट च्या पाईपलाईन रोड शाखेतून व्यवसाय वाढीसाठी ४ लाख रुपयांचे कर्ज दि.१९ मे २०२३ रोजी घेतले होते. या कर्जाची परतफेड करण्याची मुदत १०० दिवसांची होती. मात्र त्यांनी कर्ज घेतल्या पासून ४ महिने काहीही रक्कम भरली नाही. त्याने कर्ज परतफेडीसाठी संस्थेला ४ लाख ७५ हजारांचा धनादेश दिला. तो संस्थेने दि. १८ सप्टेबर २०२३ रोजी बँक खात्यात भरला असता कर्जदाराच्या बँक खात्यात पुरेशी रक्कम नसल्याने तो न वटता परत आला. त्यामुळे संस्थेने शेवाळे यास नोटीस पाठविली. मात्र त्याने त्यास काहीही प्रतिसाद दिला नाही. त्यामुळे संस्थेचे वसुली अधिकारी सुभाष तुकाराम आरडे यांनी अ‍ॅड. आर.बी. गाली यांच्या मार्फत जिल्हा न्यायालयात कर्जदार पोपट शेवाळे याच्या विरुद्ध निगोशिएबल इन्स्ट्रुमेंट्स अ‍ॅट १८८१ चे कलम १३८ नुसार दावा दाखल केला होता. त्यावर नगरच्या अतिरिक्त जिल्हा व सत्र न्यायधीश तेजस्विनी निराळे यांच्या समोर सुनावणी होवून न्या. निराळे यांनी कर्जदार शेवाळे यास दोषी धरत ४ महिने सश्रम कारावासाची शिक्षा सुनावली. तसेच कर्ज रक्कम व दंडापोटी ५ लाख २० हजार रुपये एका महिन्यात लक्षवेध मल्टीस्टेट या संस्थेकडे भरण्याचे आदेश दिले आहेत.

नगर – ख्रिस्त जन्मोत्सव हा सर्व जगभर मोठ्या आनंदाने साजरा करण्यात येत असतो. या आनंदी क्षणी सर्वांनी एकत्रित येऊन विचारांची देवाण घेवाण केली पाहिजे. आजच्या आनंद मेळाव्याच्या माध्यमातून सर्वांनी एकत्र येऊन विविध उपक्रमात सहभागी होत हा उत्सव आनंदाने साजरा केला आहे. अशा उपक्रमातून जीवनाकडे पाहण्याचा दृष्टीकोन सकारात्मक होत असतो. यामुळे येणारा काळात आपण अडचणीवर मात कराल. मेळाव्यातून जो आनंद सर्वांना मिळाला आहे, तो वर्षभर पुरणारा आहे. हे नवीन वर्ष सर्वांच्या जीवनात आनंद निर्माण करेल, अशी शुभकामना रेव्ह.अभिजित तुपसुंदरे यांनी व्यक्त केली. अहमदनगर पहिली मंडळी नाशिक धर्मप्रांत (सी. एन.आय.)च्यावतीने ख्रिस्तजन्मोत्सव २०२४ निमित्त आनंद मेळाव्याचे आयोजन करण्यात आले होते. या मेळाव्याप्रसंगी रेव्ह. अभिजित तुपसुंदरे आदिंसह सर्व कमिटीचे मेंबर्स, तरुण संघ, महिला मंडळ, संडे स्कूलचे शिक्षक, विद्यार्थी सर्व सन्मानिय सभासद उपस्थित होते. या आनंद मेळाव्यात लहान मुलांसाठी रनिंग, फुगे फोडणे, लिंबू चमचा तर महिलांसाठी संगित खुर्ची, स्लो मोपेड, कपल्ससाठी सुई-दोरा ओवणे, पुरुषांसाठीही अशाच स्पर्धांचे आयोजन करण्यात आले होते. उपस्थितांसाठी विविध प्रकारच्या खाद्यांचे स्टॉल लावण्यात आले होते, त्यांचा आनंद सर्वांनी लुटला. यावेळी केक कापण्यात येऊन फटायांची आतिषबाजी करण्यात आली. स्पर्धेतील विजेत्यांना बक्षिसांचे वितरण करण्यात आले. हे सर्व कार्यक्रम यशस्वी पार पाडण्याकरीता चर्चचे धर्मगुरु रेव्ह. अभिजीत तुपसुदरे, सचिव सतिश मिसाळ, उपसचिव प्रितम जाधव, खजिनदार डॉ. संजय लाड, उपखजिनदार सॅम्युएल बोर्डे, कार्यक्रम समिती अध्यक्ष प्रसन्ना शिंदे, प्रा. बिनीत गायकवाड, रविद्रं लोंढे, सुनित ढगे, अमोल लोंढे, कुमार हर्षल पाटोळे, सौ. शोभना गायकवाड, सौ. वंदना शिंदे, सौ. कांदबरी सुर्यवंशी, सौ. शशिकला साळुंके, श्रीमती स्नेहल साळवे या कमिटी सदस्यांनी परिश्रम घेतले. तसेच कौतुकास्पद परिश्रम चर्चचा तरुण संघाने घेतले महिला मंडळ, चर्च सभासद यांचे सहकार्य लाभले

डॉ. भाऊसाहेब सोनवणे यांचे प्रतिपादन; केडगावच्या सरस्वती विद्यालयाचा वार्षिक पारितोषिक वितरण सोहळा उत्साहात

नगर – खेळामुळे निर्णय क्षमता, नेतृत्व क्षमता वाढते. या सोबतच भावनिक विकासही होतो. त्यामुळे खेळात सहभागी व्हायला हवे. स्पर्धेमध्ये शिस्त दाखवा, स्वतःमध्ये सांघिक भावना विकसित करा, अपयश आले की खचून न जाता जिद्दीने परत उभे राहून पुढे जाण्याची तयारी करण्याचे प्रा.डॉ. भाऊसाहेब सोनवणे यांनी आवाहन केले. केडगाव येथील सरस्वती प्राथमिक, माध्यमिक आणि उच्च माध्यमिक विद्यालयात वार्षिक पारितोषिक वितरण सोहळा उत्साहात पार पडला. यावेळी विविध कला, क्रीडा, शैक्षणिक व विविध स्पर्धेसह स्पर्धा परीक्षांमध्ये यश मिळविणार्‍या विद्यार्थ्यांचा गौरव करण्यात आला. कार्यक्रमाचे प्रमुख अतिथी म्हणून प्रा.डॉ. भाऊसाहेब सोनवणे हे होते. प्रा.डॉ. अरुणराव कुलकर्णी यांच्या अध्यक्षतेखाली झालेल्या कार्यक्रमाप्रसंगी संस्थेचे सहकोषाध्यक्ष प्रा.डॉ. रावसाहेब पवार, बीएड कॉलेजचे प्राचार्य अमरनाथ कुमावत, संस्था समन्वयक डॉ. रवींद्र चोभे, प्रज्ञाताई आसनीकर, माजी नगरसेवक संभाजीराजे पवार, सावेडी शाळेच्या मुख्याध्यापिका रोहिणी काजळे, शाळेचे मुख्याध्यापक संदिप भोर, माध्यमिक विभागाच्या मुख्याध्यापिका मोहिनी धर्माधिकारी, पालक प्रतिनिधी स्वातीताई कोळपळकर, विद्यार्थी प्रतिनिधी यशराज पाचारणे, विद्यार्थिनी प्रतिनिधी दिया काकडे, अविनाश साठी, शिवाजी मगर आदींसह विद्यार्थी, पालक उपस्थित होते. जिल्हास्तरावर सुवर्ण, रौप्य, कास्य पदक पटकावून विभागीयस्तरावर यश प्राप्त करणार्‍या खेळाडूंचा यावेळी विशेष सन्मान करण्यात आला. सरस्वती विद्यालयातील विद्यार्थ्यांना गुणवत्तापूर्ण शिक्षणासह त्यांच्यातील कलागुण विकसीत करण्यासाठी राबविण्यात येत असलेल्या उपक्रमाचे उपस्थित पाहुण्यांनी कौतुक करुन विद्यार्थ्यांचे अभिनंदन केले. सूत्रसंचालन स्मिता खिलारी व अनिता क्षीरसागर यांनी केले. सुरेखा कसबे यांनी आभार मानले.

प्लास्टिकचा वापर टाळावा, कापडी पिशव्या वापराव्यात; अभियानात सहभागी होण्याचे आयुक्त यशवंत डांगे यांचे आवाहन

नगर – म हानगरपालिकेचे शहर स्वच्छता अभियान शनिवारपासून सुरू करण्यात आले आहे. शनिवारी स्टेट बँक चौक ते कोठी चौक दरम्यान स्वच्छता अभियान पार पडले. यात कचर्‍यासह प्लास्टिक, मातीचे ढीग उचलून साफसफाई करण्यात आली. नव्या वर्षात शहर स्वच्छतेसाठी महानगरपालिकेने संकल्प केला आहे. अहिल्यानगर शहर स्वच्छ शहर म्हणून ओळखले जावे, यासाठी नागरीक, सामाजिक संघटनांच्या सहकार्यातून, सहभागातून हे अभियान हाती घेण्यात आले आहे. प्रत्येक शनिवारी शहर व उपनगराच्या एकेका भागात हे अभियान राबविण्यात येणार आहे. शनिवारी महानगरपालिकेने स्टेट बँक चौक ते चांदणी चौक दरम्यान स्वच्छता अभियान राबविण्यात आले. या भागात अतिक्रमण हटाव मोहीम राबवण्यात आली होती. यात या रस्त्यालगत असलेली अतिक्रमणे हटविली होती. त्यामुळे या भागात स्वच्छता अभियान राबवून परिसर स्वच्छ करण्यात आला. रस्त्यावर पडलेला कचरा, माती व बांधकाम व पाडकामाचा कचरा उचलून परिसर स्वच्छ करण्यात आला. रस्त्याच्या दुभाजकाच्यामध्ये साचलेला प्लॅस्टिक कचरा गोळा करून स्वच्छता करण्यात आली. अभियानात नागरीक सहभागी झाले होते. नागरिकांनी . प्लास्टिकचा वापर टाळावा, कापडी पिशव्यांचा वापर करावा, असे आवाहन करतानाच शहर स्वच्छतेसाठी सुरू करण्यात आलेल्या उपक्रमात नागरीक, सामाजिक संघटनेने या अभियानात सहभागी व्हावे, असे आवाहन आयुक्त यशवंत डांगे यांनी केले आहे.

सेंट्रल रेल्वेचे महाप्रबंधक धर्मवीर मीना यांना निवेदन

नगर – शहरातील रेल्वे स्थानकाचे नाव बदलून अहिल्यानगर करण्याची मागणी भाजप रेल्वे बोर्डाचे जिल्हाध्यक्ष अनिल सबलोक यांनी सेंट्रल रेल्वेचे महाप्रबंधक धर्मवीर मीना यांच्याकडे निवेदनाद्वारे केली आहे. रेल्वेचे महाप्रबंधक मीना यांनी भारतातील सर्व रेल्वे स्टेशनला पत्र पाठवून नामांतरची प्रक्रिया सुरु झालेली असून, लवकरच नवीन नाव लावले जाणार असल्याचे आश्वासन दिले. नगरच्या रेल्वे स्थानकावर आलेले रेल्वेचे महाप्रबंधक धर्मवीर मीना यांना निवेदन देऊन झालेल्या नामांतराबाबत सबलोक यांनी लक्ष वेधले. राज्य शासनाच्या नियमाप्रमाणे अहमदनगर हे नाव बदलून आता अहिल्यानगर झाले आहे. त्याला केंद्र सरकारने देखील मंजुरी दिलेली आहे. लवकरात लवकर अहमदनगर रेल्वे स्टेशनचे नाव बदलून अहिल्यानगर करावे अशी मागणी केली आहे.

गोविंदपुरा येथे गुरु गोविंद सिंग यांच्या ३५८ व्या जयंतीनिमित्त जिल्हा पोलिस प्रमुख राकेश ओला यांनी गुरुद्वारास भेट देत दर्शन घेतले

नगर – गोविंदपुरा गुरुद्वाराभाई दयासिंगजी येथे शीख, पंजाबी, सिंधी समाजाने एकत्र येऊन विविध धार्मिक कार्यक्रमाने दहावे गुरु, गुरु गोविंद सिंग यांच्या जयंती मोठ्या उत्साहात साजरी करण्यात आली यानिमित्त जगाच्या शांततेसाठी प्रार्थना केली व धार्मिक गीत गायन, अखंड पाठ, भजन किर्तन, कथा आयोजित करण्यात आले होते. यावेळी गुरुगोविंद सिंग यांच्या जीवन संदर्भात माहिती दिली. गुरुगोविंद सिंग कोण होते. यासंदर्भात त्यांच्या वडिलांचे नाव गुरु तेग बहादुर होते आणि ते शीखांचे नववे गुरु होते. त्यांच्या मृत्यूनंतर गुरु गोविंद सिंग शीख धर्माचे दहावे गुरु बनले. गोविंद सिंग यांचा जन्म २२ डिसेंबर १६६६ मध्ये पटना बिहार मध्ये झाला. त्यांचा जन्मदिवस गुरुंच्या जन्म उत्सव नानकशाही कॅलेंडरवर आधारित आहे. या वर्षी गुरु गोबिंद सिंग जयती ६ जानेवारी म्हणजेच आज सर्वत्र साजरी केली जात आहे. गुरु गोबिंद सिंह नी संत सैनिकांच्या खालसा दलाची स्थापना १६९९ मध्ये केली होती. ते जातिवाद आणि अंधविश्वास यांच्यावर विश्वास ठेवत नसे आणि कोणी यावर विश्वास ठेवू नये असे त्यांचे म्हणणे होते. गुरुगोविंद सिंग यांच्या जयंतीनिमित्त महाप्रसादचे आयोजन करण्यात आले होते. यावेळी आ. संग्राम जगताप, जिल्हा पोलीस प्रमुख राकेश ओला यांनी गुरुद्वाराला भेट देत दर्शन घेतले, समाजाच्या वतीने त्यांचा सत्कार करण्यात आला. दरम्यान गुरुद्वाराचे हेड ग्रंथीभाई गुरुभेदसिंग हजुरी, जयाभाई समरथसिंगजी व अमृतसरचे भाई सुखप्रीत सिंग साज यांनी भाविकांना कीर्तनाने मंत्रमुग्ध केले, बोले सो निहाल, सतसीअकाल व वाहे गुरुजी का खालसा, वाहे गुरुजी कि फतेहच्या गर्जनाने संपूर्ण परिसर भक्तिमय झाला होता.

स्टेशन रस्त्यावरील घटना, चोरी करताना चोरटा सीसीटीव्हीत कैद

नगर – एमआयडीसी येथील लासिक व्हील लिमिटेड कंपनीच्या स्टेशन रस्त्यावरील कार्यालयातून चोरट्याने कर्मचार्‍यांच्या पगारासाठी ठेवलेली १५ लाख ५५ हजारांची रोकड चोरून नेली. शनिवारी (दि.४) सकाळी ८ वाजण्याच्या सुमारास ही घटना समोर आली. चोरट्याने ऑफिसच्या पहिल्या मजल्यावर असलेल्या खिडकीतून आत प्रवेश केल्याचे सीसीटीव्हीत कैद झाले आहे. या प्रकरणी सुनिल शांतीलाल मुनोत (वय ६०, रा. हिरकेश बंगलो, प्लॉट नं. ४२ (अ), स्टेशनरोड) यांनी दिलेल्या फिर्यादीवरून कोतवाली पोलिस ठाण्यात गुन्हा दाखल करण्यात आला आहे. सुनील मुनोत हे लासिक व्हील लिमिटेड कंपनीचे व्यवस्थापकीय संचालक आहेत. कंपनीचे ऑफीस त्यांच्या हिरकेश बंगल्यातच आहे. तेथूनही ते कंपनीचे व्यवस्थापकीय कामकाज, कर्मचार्यांचे पगार करतात. शुक्रवारी (दि.३) त्यांनी नेहमीप्रमाणे सायंकाळी ६ वाजण्याच्या सुमारास ऑफीस बंद केले. शनिवारी सकाळी ८ वाजण्याच्या सुमारास ऑफीसच्या सफाई कामगाराला साफसफाई करताना ऑफीसमधील ड्रॉव्हर तोडल्याचे दिसले. तिने ऑफीसमधील कर्मचार्याला याची माहिती देताच कर्मचार्याने मुनोत यांना फोन करून माहिती दिली. मुनोत यांनी पाहणी केली असता ऑफीसमधील टेबलचे ३ ड्रॉव्हर तोडल्याचे व त्यात कर्मचार्यांचे पगार करण्यासाठी ठेवलेली १५ लाख ५५ हजारांची रक्कम चोरीला गेल्याचे स्पष्ट झाले. अज्ञात चोरट्याने ऑफीसच्या पहिल्या मजल्यावरील खिडकीतून आत प्रवेश करून चोरी केल्याचे सीसीटीव्हीत दिसून आले. त्यांनी कोतवाली पोलिसांना घटनेची माहिती देताच पथक घटनास्थळी दाखल झाले. चोरट्याने ऑफिसमध्ये प्रवेश केल्याचे सीसीटीव्हीत दिसून आल्याने पोलिसांनी फुटेज ताब्यात घेतले आहे. चोरट्याची ओळख पटवून त्याचा शोध घेण्याचे काम सुरू असल्याचे पोलिस निरीक्षक प्रताप दराडे यांनी सांगितले.