नगर – गेल्या अनेक वर्षांपासून शहरातील काही इंग्रजी माध्यमांच्या शाळांचा मनमानी कारभार व सुरू आहे. याबाबत अनेकदा मनविसेने शिक्षण विभागाकडे तक्रारी केल्या आहेत. या शाळांमध्ये हिंदू धर्मविरोधी कारवाया सुरु आहेत. तसेच पालकांची सर्रास आर्थिक पिळवणूक केली जात आहे. त्यावर शिक्षण विभाग थातूरमातूर एखादं पत्र काढून शांत
बसतं आणि या सर्व शाळांचा मनमानी कारभार सुरूच राहतो. याविरोधात महाराष्ट्र नवनिर्माण विद्यार्थी सेनेचे महाराष्ट्र उपाध्यक्ष सुमित वर्मा यांच्या नेतृत्वाखाली पदाधिकार्‍यांनी शिक्षणाधिकारी भास्करराव पाटील यांच्या कार्यालयात घेराव
घातला. शाळांमधील हा गैरकारभार थांबला नाहीतर इंग्रजी शाळेत हनुमान चालीसा पाठ करण्यात येईल,
असा इशारा त्यांनी दिला.
शासनाच्या आदेशाचे पालन जर शिक्षण विभागाला करता येत नसेल तर आम्ही समर्थ आहोत. आम्ही त्या धर्मांध शाळांच्या मनमानी कारभारास विरोध करणार आहोत. या शाळांमध्ये गंध लाऊ न देणे, पैंजण घालू न देणे, हिंदू सणावाराला मेहेंदी काढू न देणे या सर्व फतव्यांना विरोध करणार आहोत. तसेच या शाळांमधून विशिष्ट धर्माच्या प्रार्थना जर थांबल्या
नाहीत तर आम्ही या शाळांमध्ये जाऊन हनुमान चालीसा पाठ करू, असे सांगितले. त्यावर शिक्षणाधिकारी भास्कर पाटील यांनी तात्काळ शहरातील २० इंग्रजी माध्यमांच्या शाळांचा सर्व्हे करण्याचे लेखी आश्वासन दिले आणि दोषी शाळांवर मान्यता रद्द करण्याची कार्यवाही करण्यात येणार असल्याचे आश्वासन दिले. आंदोलनात जिल्हाध्यक्ष प्रकाश गायकवाड, युवती जिल्हाध्यक्ष श्रद्धा खोंडे, शहराध्यक्ष अनिकेत शियाळ सहभागी झाले होते.
