नगर – सोशल मीडियावर ओळख झालेल्या अनोळखी व्यक्तीकडे शेअर ट्रेडिंगमध्ये गुंतवणूक केल्याने नगरमधील नोकरदाराची ३० लाख रूपयांची फसवणूक झाली. फसवणूक झालेली व्यक्ती आनंदनगर, गुलमोहर रस्ता, सावेडी येथे राहात असून त्यांनी शनिवारी (दि. २० एप्रिल) येथील सायबर पोलीस ठाण्यात फिर्याद दिली आहे. दिलेल्या फिर्यादीवरून एका व्हॉट्सअप नंबर धारक अनोळखी व्यक्तीविरूध्द भादंवि कलम ४१९, ४२० सह आयटी अ‍ॅट कलम ६६ (डी) नुसार गुन्हा दाखल करण्यात आला आहे. सदरचा प्रकार १६ जानेवारी २०२४ ते १७ फेब्रुवारी २०२४ दरम्यान घडला आहे. फिर्यादी यांना शेअर ट्रेडिंगमध्ये गुंतवणूक करायची असल्याने ते सोशल मीडियावरील इंस्टाग्रामवर माहिती घेत असताना त्यांची एका अनोळखी व्यक्तीसोबत ओळख झाली. त्या व्यक्तीने फिर्यादीसोबत व्हॉट्सअप नंबरवरून संपर्क केला. शेअर ट्रेडिंगमध्ये गुंतवणूक केल्यास अधिक नफा मिळवून देण्याचे आमिष दाखविले. फिर्यादीने त्याच्यावर विश्वास ठेवला व सुरूवातीला २० लाख व नंतर १० लाख रूपये असे एकुण ३० लाख रूपये शेअर ट्रेडिंगमध्ये गुंतवणूकीसाठी दिले. दरम्यान गुंतवणूक केल्यानंतर देखील समोरच्या व्यक्तीने फिर्यादीला नफा दिला नाही व गुंतवणूक केलेली रक्कम देखील परत केली नाही. फिर्यादीने त्या व्यक्तीसोबत वारंवार संपर्क करून पैशाची मागणी केली असता त्याने टाळाटाळ केली. त्यानंतर येथील सायबर पोलीस ठाण्यात संपर्क करून २० एप्रिल रोजी फिर्याद दिली. पोलिसांनी गुन्हा दाखल केला असून अधिक तपास सायबर पोलीस ठाण्याचे प्रभारी अधिकारी पोलीस निरीक्षक दिनेश आहेर करत आहेत.
