आमदार निलेश लंके यांच्या पक्ष प्रवेशाची चर्चा राष्ट्रवादी काँग्रेसचे शरद पवार यांनी फेटाळली

0
30

चर्चेत तथ्य नसल्याचे केले स्पष्ट; मात्र लंकेचे समर्थक म्हणतात ’वेट ॲण्ड वॉच’… सगळं ओके होईल

नगर – पारनेर विधानसभा मतदारसंघातील राष्ट्रवादी काँग्रेसचे आमदार निलेश लंके राष्ट्रवादी काँग्रेस शरदचंद्र पवार पक्षात प्रवेश करणार असल्याच्या चर्चेत तथ्य नसल्याचे स्वत: ज्येष्ठ नेते शरद पवार यांनी सांगितले. असे अनेक लोक आमच्या पक्षात येण्यास इच्छूक आहेत, अनेकांची चर्चा आहे. मात्र, लंके यांच्याबाबतीत यात काहीही तथ्य नाही, असे म्हणत पवार यांनी सोमवारी (दि.११) सकाळी पुण्यात घेतलेल्या पत्रकार परिषदेत ही चर्चा फेटाळून लावली. असे असले तरी आ. लंकेचे जवळचे समर्थक मात्र दोन तीन दिवस थांबा सर्व काही ओके होईल असे म्हणत आहेत. त्यामुळे आता नेमके काय घडणार हे येत्या काही दिवसांत स्पष्ट होणार आहे. आ.निलेश लंके परतीच्या मार्गावर असल्याची चर्चा गेल्या काही दिवसांपासून सुरु होती. खासदार अमोल कोल्हे यांनी लंकेंना परतीची साद घातली होती. अहम दनगर लोकसभा मतदारसंघातील उमेदवारीचे गणित लक्षात घेऊन आ. लंके सोमवारी घरवापसी करणार असल्याचं बोललं जात होतं. उपमुख्यमंत्री अजित पवार यांची साथ सोडून लंके पुन्हा ज्येष्ठ नेते शरद पवार यांच्यासोबत येणार असल्याची चर्चा होती. तसं झालं असतं तर परतीच्या मार्गाने आलेले लंके पहिलेच लोकप्रतिनिधी ठरले असते. राष्ट्रवादी काँग्रेसच्या फुटीच्या वेळी लंके अजित पवारांच्या सोबत गेले होते. मुख्य म्हणजे त्यावेळी त्यांनी आपली भूमिका दोनदा बदलली होती. त्यानंतरही त्यांनी आपण नेमके कोणासोबत आहोत, हे स्पष्ट होऊ दिले नव्हते. लंके आपल्या कार्यक्रमात शरद पवार आणि अजित पवार या दोघांचेही फोटो वापरत होते. नुकताच त्यांचा वाढदिवस झाला. त्याच्या जाहिराती करतानाही ’अब दिल्ली दूर नही’, अशी टॅग लाईन, संसद भवनाचा फोटो आणि दोन्ही पवारांचे फोटो अशी रचना लंके यांनी केली होती. लंके स्वत: किंवा त्यांच्या पत्नी राणी लंके यांच्यासाठी नगर लोकसभा मतदारसंघातून इच्छूक आहेत. त्यासाठी त्यांनी जोरादार तयारी सुरू केली. राष्ट्रवादी पक्ष अखंड असताना ते भाजपचे खासदार डॉ. सुजय विखे पाटील यांच्या विरोधात राष्ट्रवादीचे उमेदवार म्हणून ओळखले जाऊ लागले होते. स्वत: शरद पवार यांनीही तसे संकेत देत त्यांना ताकद दिली होती.

स्वत: पवार आणि अजित पवार यांनीही लंके यांच्या विविध कार्यक्रमांना आणि त्यांच्या घरीही हजेरी लावली होती. मात्र, पक्ष फुटीच्यावेळी लंके अजित पवारांच्या सोबत गेले. मात्र नगरची जागा भाजपच्या वाट्याला आहे. येथे बदल होण्याची शयता धूसर असल्याने लंके पुन्हा शरद पवार यांच्यासोबत जाणार असल्याची चर्चा सुरू झाली. सोमवारी सकाळी ही चर्चा अचानक वेगाने सुरू झाली. पवार यांनी पुण्यातील निवासस्थानी पत्रकार परिषद बोलाविली होती. त्यावेळी लंके यांचा पक्षप्रवेश आणि घोषणा होणार असल्याचे सांगण्यात येत होत होते. शिवाय लंके रात्रीच पारनेरमधून बाहेर गेलेले आहेत. पारनेरमधील त्यांच्या कार्यकर्त्यांना याची माहिती नव्हती. राष्ट्रवादीच्या काँग्रेसच्या स्थानिक प्रमुख पदाधिकार्‍यांनाही यांची माहिती नव्हती. तरीही सूत्रांच्या हवाल्याने लंकेच्या घरवापसीच्या बातम्या पसरत होत्या. यासंबंधी पत्रकारांनी पत्रकार परिषदेतच खुद्द पवार यांना विचारले. त्यावर पवार म्हणाले की या चर्चेत काहीही तथ्य नाही. लंके संपर्कात आहेत, ते आले तर त्यांना पुन्हा प्रवेश देणार का? या प्रश्नांनाही पवार यांनी थेट उत्तरे दिली नाहीत. जे सोडून गेले आहेत, त्यांनाही हे काही बरे चालले नाही, हे कळत आहे. त्यामुळे अनेकांची अशा अनेकांच्या चर्चा आहेत, अनेक इच्छूक आहेत. यासंबंधी माहिती तपासून, योग्य वेळी निर्णय घेतले जातील, असे पवार म्हणाले. त्यामुळे लंके यांच्या घरवापसीच्या चर्चेवर तूर्त तरी पडदा पडला आहे. असे असले तरी लंके यांचे जवळचे सहकारी मात्र थोडं थांबा सगळं काही ओके होईल असे सांगत असल्याने नेमकं काय होईल हे पाहण्यासाठी काही काळ प्रतीक्षा करावी लागणार आहे.