एखाद्या कंपनीमध्ये नोकरी करताना तेथील नियम पाळावे लागतात. सर्व कंपन्यांमध्ये सर्वसाधारणपणे सारख्या सोयीसुविधाही देण्यात येतात. कंपनीचे नियम काटेकोरपणे पाळावे लागतात. अन्यथा, दंड भरावा लागतो. नोकरी जाण्याचा धोकाही असतो. कोणत्याही कंपनीत रुजू होताना आपल्याला या नियमांची माहिती दिली जाते. दरम्यान, काही कंपन्यांकडून काही विचित्र नियम लागू करण्यात येतात. अशाच एका कंपनीच्या नियम ानुसार कर्मचार्‍याचे विवाहबाह्य संबंध आढळल्यास नोकरीवरून काढून टाकले जाते. कर्मचार्‍याचे विवाहबाह्य संबंध असतील तर पत्नीला धोका देणार्‍या कर्मचार्‍याला या कंपनीत कामावरून हटवण्यात येते. विवाहबाह्य संबंध रोखण्यासाठी कंपनीने हा विचित्र नियम लागू केला आहे. पतीने पत्नीशी एकनिष्ठ राहावे, असा या मागचा हेतू आहे. ‘साऊथ चायना मॉर्निंग पोस्ट’ने म्हटलेआहे की या चिनी कंपनीने कोणत्याही कर्मचार्‍याने विवाहबाह्य संबंध ठेवल्यास नोकरी गमवावी लागू शकते. कंपनीने नऊ जूनपासून कर्मचार्‍यांसाठी हा विचित्र नियम लागू केला. कंपनीतील सर्वमहिला आणि पुरुष कर्मचार्‍यांसाठी हा आदेश जारी करण्यात आला आहे. पत्नीने पतीला धोका दिल्यास तिलाही कंपनीकडून नारळ देण्यात येतो. कंपनीच्या म्हणण्यानुसार, विवाहबाह्य संबंधांवर बंदी घालण्याचा नियम संस्थेचे अंतर्गत व्यवस्थापन मजबूत करण्यासाठी करण्यात आला आहे. कंपनीच्या मते, कॉर्पोरेट कंपन्यांमध्ये कंपनीशी एकनिष्ठ रहावे लागते. कंपनी आणि कुटुंबाच्या सुरक्षिततेचा विचार करणे महत्त्वाचे आहे या कंपनीने घटस्फोटालाही मनाई केली आहे. कंपनीच्या कर्मचार्‍यांसह ‘सोशल मीडिया’वर याबाबत संमिश्र प्रतिक्रिया उमटत आहेत. ‘साऊथ चायना पोस्ट’च्या रिपोर्टनुसार, कंपनीने एका वरिष्ठ कार्यकारी अधिकार्‍याला कामावरून हटवले आहे. हा कर्मचारी एका महिलेसोबत हातात हात घालून फिरताना दिसला. ही महिला त्याची पत्नी नव्हती. या दोघांचे फोटो व्हायरल झाल्यानंतर कंपनीने ही कारवाई केली आहे.
