स्व उत्पन्नासह केंद्र व राज्य सरकारच्या निधीतून अनेक प्रकल्प लागणार मार्गी
नगर -अहिल्यानगर महापालिकेच्या लोकनियुक्त सदस्यांची मुदत संपून सव्वा वर्ष झाले आहे. त्यामुळे प्रशासक तथा आयुक्त यशवंत डांगे यांनी महापालिकेचा सन २०२५-२६ चा एकुण १६८० कोटी रुपयांचा अर्थसंकल्प प्रशासकीय स्थायी समितीत १२ मार्च रोजी दुपारी सादर केला. या आर्थिक वर्षात स्व उत्पन्नासह केंद्र व राज्य सरकारच्या निधीतून अनेक प्रकल्प मार्गी लागणार असल्याचा विश्वास आयुक्त डांगे यांनी व्यक्त केला.
यावेळी मुख्य व लेखा वित्त अधिकारी सचिन धस, उपायुक्त डॉ. विजयकुमार मुंढे, सहायक आयुक्त निखील फराटे, सपना वसावा, प्रियंका शिंदे, नगरसचिव मेहेर लहारे, शहर अभियंता मनोज पारखे, जल अभियंता परिमल निकम, लेखा विभागाचे अनिल लोंढे तसेच इतर विभाग प्रमुख उपस्थित होते. यावेळी जमा व खर्चाचे अंदाज आरंभीची शिल्लक रु. ३६५.१० लक्ष व जमा १६७६३१.७८ लक्ष अशी मिळून एकत्रित जमा १६७९९६.८८ लक्ष आणि खर्च रु. १६७६५०.८१ व शिल्लक रु. ३४६.०७ लक्ष असे महापालिकेचे सन २०२५-२०२६ चे मुळ अर्थसंकल्पीय अंदाज मंजूर करण्यात आले.
खर्च बाजूस वेतन, भत्ते व मानधनावर १७० कोटी ६४ लाख, पेन्शन ५४ कोटी, पाणी पुरवठा विज बिल ४० कोटी, स्ट्रीट लाईट विज बिल ८ कोटी, शिक्षण विभाग वेतन हिस्सा व इतर खर्च हिस्सा ६ कोटी, महिला व बाल कल्याण योजना ३ कोटी २५ लाख, अपंग पुनर्वसन योजना ३ कोटी २५ लाख, मागासवर्गीय कल्याणकारी योजना ८ कोटी ४१ लाख, औषधे व उपकरणे १ कोटी ७० लाख, कचरा संकलन व वाहतूक १८ कोटी, पाणी पुरवठा साहित्य खरेदी व दुरुस्ती १ कोटी, टँकरद्वारे पाणी पुरवठा व तुरटी, ब्लिचिंग पावडर खरेदी २ कोटी ७५ लाख, अशुध्द पाणी आकार ४ कोटी, विविध वाहने खरेदी ३ कोटी, नविन रस्ते ३०० कोटी, रस्ते दुरुस्ती ३ कोटी,
इमारत दुरुस्ती ५५ लाख, शहरातील ओढ नाले साफसफाई ५५ लाख, आपत्कालीन व्यवस्थापन ५० लाख, कोडवाड्यावरील खर्च १२ लाख, वृक्षारोपण तदनुषंगिक खर्च १ कोटी, हिवताप प्रतिबंधक योजना ६० लाख, कचरा डेपो सुधारणा व प्रकल्प उभारणी १ कोटी १६ लाख, मोकाट कुत्री व जनावरे बंदोबस्त ९५ लाख, मालमत्ता सर्वेक्षण १० कोटी, मृत जनावरे विल्हेवाट प्रकल्प ३५ लाख, पुतळे बसविणे २ कोटी, भविष्य निर्वाह निधी तूट २ कोटी ५० लाख, बेवारस प्रेत विल्हेवाट ४० लाख, उद्यान दुरुस्ती २५ लाख यासह इतर बाबींबर खर्च अपेक्षीत आहे.
महापालिका अंदाजपत्रकात महसुली उत्पन्न रु. ४५२ कोटी ०३ लाख, भांडवली जमा रु. ११५९ कोटी ०५ लाख अंदाजित आहे. महसुली उत्पन्नात संकलीत करापोटी रु. १०३ कोटी ८० लाख, संकलीत करावर आधारीत करापोटी ५८ कोटी ७० लाख, जी एस टी अनुदान १४० कोटी ६७ लाख व इतर महसुली अनुदान रु. १८ कोटी, गाळा भाडे ३ कोटी ८२ लाख, पाणीपट्टी ३० कोटी लाख, मिटरद्वारे पाणी पुरवठापोटी १० कोटी, संकीर्णे ३० कोटी इ. महत्वाच्या बाबी आहेत. तसेच विविध शासकीय निधी मोठ्या प्रमाणत मिळणार असल्याने शहर विकासासाठी त्याचा मोठा हातभार लागणार आहे.
महत्वाच्या भांडवली कामांवर होणारा खर्च पुढील प्रमाणे
लोकशाहीर अण्णाभाऊ साठे नागरी दलित वस्ती सुधारणा – २० कोटी, मुलभूत सुविधा विकास निधी – ७० कोटी, पर्यटनासाठी पायाभूत सुविधा – १५ कोटी, अमृत शहर पाणी पुरवठा फेज २ – १२ कोटी, नाट्य संकुल – १० कोटी, रस्ता अनुदानातून रस्ते -३ कोटी, महाराष्ट्र सुवर्ण जयंती नगरोत्थान अभियान – १०० कोटी, नगरोत्थान जिल्हास्तर – ३४ कोटी, नाविन्यपूर्ण योजना – ४ कोटी, नागरी घनकचरा व्यवस्थापन – १० कोटी ८३ लाख, डॉ. बाबासाहेब आंबेडकर सामाजिक विकास योजना -१० कोटी, ई बस – १२ कोटी, संविधन भवन – १५ कोटी, जिल्हा ग्रंथालय इमारत बांधणे – १५ कोटी, दलितेतर वस्ती सुधारणा – २४ कोटी, सर्वांसाठी घरे – ३० कोटी, अमृत योजना- भुयारी गटर योजना – ३७ कोटी ५० लाख, अमृत योजना- मलनिःसारण केंद्र उभारणे – २१ कोटी २५ लाख, अमृत/नगरोत्थान राज्यस्तर पाणी पुरवठा योजना – १०० कोटी, २ मेगावॅट सौर उर्जा निर्मीती प्रकल्प – १०० कोटी, खासदार निधी – ५ कोटी, आमदार निधी – १६ कोटी. असा खर्च अपेक्षित आहे.
नगर शहर वासीयांच्या सेवेसाठी आपण आयुक्त तथा प्रशासक म्हणून २४ तास ७ दिवस उपलब्ध असून या शहराचा केवळ विकास न करता शहरवासियांचे आरोग्य चांगले राहावे, शहर स्वच्छ व सुंदर करण्याचा आपला मानस आहे. या प्रक्रियेत सर्व शहरवासियांनी सहकार्य करावे असे आवाहन शेवटी आयुक्त डांगे यांनी केले आहे.
