खांडके शिवारात ’विंड वर्ड इंडीया’ प्रकल्पात टाकला होता दरोडा
नगर – नगर तालुयातील चांदबीबी महाल परिसरात गर्भगिरीच्या डोंगररांगांत खांडके गावच्या शिवारात असलेल्या विंड इंडीया लि. (पॉवरकॉन) पवनचक्की प्रकल्पात कंपनीच्या सुरक्षा रक्षकाचे हात पाय बांधून दरोडा टाकणार्या टोळीतील दोघांना पकडण्यात स्थानिक गुन्हे शाखेच्या पथकाला यश आले आहे. प्रशांत बाळु चांदणे (वय २२, रा. सोनेवाडी, ता. नगर), मोबिन मेहबुब अन्सारी (वय २५, रा. कॅम्प कौलारु, सर्जेपुरा, अहमदनगर) असे आरोपींची नावे आहेत. विंड इंडीया लि. (पॉवरकॉन) पवनचक्की प्रकल्प येथे दि.६ मे रोजी रात्री अनोळखी ५ ते ६ इसम त्यांचे ताब्यातील २ टेम्पो व एका मोटार सायकलवर आत येवुन सुरक्षा रक्षक चंद्रकांत ठोंबरे याचे हातपाय बांधुन ठेवले. त्यावेळी सुरक्षा रक्षकाने स्वत:ची सुटका करुन प्रकल्पाचे सुपरवायझर संभाजी पालवे यांना फोन करुन सदर ठिकाणी बोलावुन घेतले असता अनोळखी आरोपींनी सुपरवायझर व सुरक्षा रक्षक यांचेशी झटापट व मारहाण केल्याने ते जवळील मेहकरी गावात गेले व गांवातील लोकांची मदतीने आरोपींना अडविण्याचा प्रयत्न केला असता आरोपींनी ताब्यातील १ टेम्पो, १ मोटार सायकल व चोरी केलेले विद्युत वाहक खांड सोडुन पळुन गेले होते.
याबाबत नगर तालुका ठाण्यात दरोड्याचा गुन्हा दाखल करण्यात आला होता. सदर घटना घडल्यानंतर पोलीस अधीक्षक राकेश ओला यांच्या आदेशानुसार स्थानिक गुन्हे शाखेचे पो.नि. दिनेश आहेर पोलिस उपनिरीक्षक तुषार धाकराव व अंमलदार भाऊसाहेब काळे, गणेश भिंगारदे, देवेंद्र शेलार, विजय ठोंबरे, प्रमोद जाधव, मेघराज कोल्हे व अरुण मोरे अशांचे पथक नेमुन समांतर तपास सुरु केला. गुन्ह्यातील आरोपींनी गुन्हा करतांना वापरलेली व सोडून गेलेल्या मोटार सायकलचे मदतीने आरोपींची माहिती घेत असताना मोटार सायकल ही प्रशांत बाळु चांदणे (रा. सोनेवाडी, ता. नगर) याचे मालकीची असल्याचे समजल्याने पथकाने त्याला राहते घरी ताब्यात घेतले. त्याचेकडे सदर गुन्ह्याचे अनुषंगाने विचारपुस करता त्याने त्याचे इतर साथीदार मोबिन अन्सारी (रा. कॅम्प कैलारु, सर्जेपुरा), सुरजीत गुंजाळ (रा. माथनी, ता. नगर), महेश पवार (रा. निबोंडी, ता. नगर) व त्याचे २ मित्र अशांनी मिळुन केल्याचे सांगितले. या पथकाने मोबिन मेहबुब अन्सारी यालाही पकडले. या दोन्ही आरोपींकडे गुन्ह्यात चोरी केलेल्या माला बाबत अधिक विचारपुस करता त्यांनी सदरचा माल हा बजरंग शाळे जवळील भंगार व्यवसायीक सागर कुकरेजा (रा. अहमदनगर) यास विक्री केल्याचे सांगितले. आरोपींचे इतर साथीदारांचा शोध घेतला परंतु ते मिळुन आले नाहीत. ताब्यातील दोन्ही आरोपींना नगर तालुका पोलिस ठाण्यात दाखल गुन्ह्याचे तपासकामी नगर तालुका पोलीस स्टेशन येथे हजर करण्यात आले आहे.