प्रदीप पठारे (मयत)
नगर – रेल्वे मार्ग क्रॉसिंग करत असताना रेल्वे गाडीची धडक बसून एकाचा मृत्यू झाल्याची घटना नगर तालुयातील देहरे गावात रविवारी (दि.२) रात्री ८ च्या सुमारास घडली प्रदीप रामदास पठारे (वय ३२, रा. देहरे, ता,नगर) असे मयताचे नाव आहे. पठारे हे शेतकरी होते व गावच्या शिवारात असलेल्या मळ्यात राहत होते. रविवारी रात्री ८ च्या सुमारास मळ्यातून गावात येण्यासाठी ते रेल्वे मार्ग क्रॉसिंग करत असताना त्याच वेळी आलेल्या रेल्वे गाडीची त्यांना जोराची धडक बसल्याने ते गंभीर रित्या जखमी झाले.
त्यांना त्यांचे नातेवाईक नामदेव रंगनाथ पठारे व इतरांनी उपचारासाठी नगरच्या जिल्हा शासकीय रुग्णालय उपचारासाठी रात्री ९ च्या सुमारास दाखल केले. मात्र तेथील मेडिकल ऑफिसर डॉ.बोठे यांनी त्यांना उपचारापूर्वीच मयत घोषित केले. या प्रकरणी एमआयडीसी पोलीस ठाण्यात आकस्मात मृत्यूची नोंद करण्यात आली आहे. मयत पठारे यांच्या पश्चात पत्नी, १ मुलगा, १ मुलगी असा परिवार आहे.
