मोजणीसह हद्दनिश्चितीच्या कामास आला वेग
शहरातून वाहणार्‍या सीना नदीपात्राच्या हद्दनिश्चितीचे काम २७ डिसेंबरपासून सुरू झालेले असून, बोल्हेगाव रस्त्यावरील लहान पुलापर्यंत ही मोजणी पूर्ण झाली आहे. दरम्यान, नागापूर पुलापर्यंत खांब बसवण्याचे काम पूर्ण करण्यात आले आहे. महापालिका हद्दीतील नागापूर गावठाण येथून या हद्दनिश्चितीला सुरुवात होऊन, १ जानेवारीपर्यंत बोल्हेगाव रस्त्यावरील लहान पुलापर्यंत हद्दनिश्चितीच्या खुणा करण्याचे काम पूर्ण झाले आहे. २७ डिसेंबरपासून प्रत्यक्ष सीनापात्राच्या हद्दनिश्चितीचे काम सुरू असून, यात महापालिकेचा अतिक्रमण विभाग, नगररचना विभाग आणि भूमिअभिलेख कार्यालयाचे पथक सहभागी झाले आहे. भूमिअभिलेख कार्यालयाकडून डिजिटल रोव्हर मशिनने मोजणी करण्यात येत आहे. या रोव्हरच्या मॅपनुसार नदीच्या दोन्ही बाजूने हद्दनिश्चितीच्या खुणा करण्यात येत आहेत. सहा दिवसात बोल्हेगाव रस्त्यावरील लहान पुलापर्यंत खुणा करण्यात आल्या आहेत. सीना नदीपात्राची मोजणी झालेल्या जागी खुणा केल्यानंतर त्याचे खांब लावण्याचे काम पाठोपाठ सुरू करण्यात आले आहे. आतापर्यंत नागापूर पुलापर्यंत दोन्ही बाजूने खांब रोवण्यात आले आहेत, अशी माहिती अतिक्रमण विभागाचे क्षेत्रीय अधिकारी रिझवान शेख यांनी दिली. सीना नदीपात्राची हद्द निश्चित झाल्यानंतर त्याचे नकाशे भूमिअभिलेख कार्यालयाकडून महापालिकेला देण्यात येणार आहेत. सध्या केवळ हद्दनिश्चितीचेच काम सुरू असून, पात्राभोवती झालेल्या अतिक्रमणाबाबत तसेच खाजगी मालमत्ताधारकांच्या मालमत्तांसंदर्भात प्रशासकीय पातळीवर नंतर निर्णय घेण्यात येणार असल्याचे सांगण्यात आले. हद्दनिश्चिती झाल्यानंतर सीना सुशोभिकरणासह पूरनियंत्रण रेषा निश्चित करण्यासाठी कार्यवाही करण्यात येणार आहे. या मोहिमेत महापालिका अतिक्रमण विभागाचे प्रमुख आदित्य बल्लाळ, नगररचना विभागाचे राम चारठाणकर, अभियंता जितेंद्र शेळके, रिजवान शेख, गणेश यातम, संजय चव्हाण, खलील पठाण, बाळासाहेब व्यापारी, संदीप फाळके, सुरेश भुतकर, सुरज दहिहंडे, मोहन ढवळे आदींसह भूसंपादन विभागाच्या अधिकारी श्रीमती तिवारी कर्मचारी उपस्थित होते यांच्यासह भूमिअभिलेख कार्यालयातील अधिकारी-कर्मचारी सहभागी झाले आहेत.
